C兄的抗癌日誌

即使拆PortA之後每兩三日就打射波，都無影響到傷口，只是防水膠布好臭要換。 30號教授和姑娘睇左傷口，話痊癒得好好，其他胸骨痛和左胸肌肉痛都係無問題的。雖然仲有痛，但係對教授的判斷我是信了。最後姑娘幫我拆線，終於結療了!!  準備5月3日返工。 之後就預約再去醫院跟進，希望一直穩定地健康落去。

醫院的Pet scan需求都幾多，約左15號入院，16號照 照完訓醒已經在病房的流動床，要過床，仲諗住手術後唔痛咁好，一碌碌左去病房原本張床 唔知係咪因為咁，可能郁到傷口，下午出院時傷口膠布比較多血跡，嚇親阿媽，結果搵門診醫生換過膠布，又用了一筆錢

 9號做Pet Scan，12號知道結果 一切正常! 係有少少發炎，不過教授話無事，感恩

感覺開始麻木，都係作悶無胃口 最後一日係好感慨，終於都完成了所有化療 感激家人的支持和醫護的照顧

其實同上一次無乜唔同，第二日開始化療，第三日就無胃口同攰，唯一唔同啲係便秘勁左，最後一日先去得多，期間仲擔心排唔同便點算，好彩無問題。 感恩第五次化療順利完成。

醫院都想比我在屋企過新年食年糕，出院時間岩岩好。今年係無乜氣氛，無拜年同埋出街活動，反正抵抗力弱唔出得街，對我黎講無乜野。 覆診之後籃球場終於解封，連續三日都去射波，爽！而肌肉仲爽，化療咁耐都無乜運動，一運動超級酸痛，證明無乜肌肉了😅有排先練得返以前的狀態，不過有得打返波已經好滿足 😄

頭兩日做PET Scan同打標靶藥，無異樣，胃口正常，之後打化療就無胃口，覺得好滯。精神就一般，一日有一半時間係精神的，其他時間都想訓係床度休息(但係訓係度仲滯)。總算無其他嚴重副作用，還好。

習慣左療程，而家治療心情係輕鬆的。 另外聽到隔離床的一對老夫婦同一個女醫護人員對話，男長者係病人，慢慢食緊晚餐。節錄一段，女長者無惡意咁同醫護講：「佢食得好慢阿唔好意思」醫護：「唔緊要慢慢食啦」女長者：「咁野食係要熱食先好食架嘛」。 我覺得好感歎，因為我都遇過呢種情況，人地可能覺得食物應該盡早享用無錯，應該食哂佢唔好浪費；但係從化療病人的角度黎講，一來無胃口，作悶唔想食野，味道變左，平時幾好味既野都要慢慢先吞到。二來感到少少難受，唔通食物比病人更加重要，你緊張食唔哂多過病人食唔落？所以希望照顧者體諒，少食多餐，請不要讓病人一次食咁多。

係屋企時間多，多左整野食，包括coleslaw, 牛柳粒

估唔到今次化療係感覺最好的，作悶已經習慣了，除此之外倒沒有太多不適，精神比前兩次化療好。 化療期間對肉類的味覺改變，會有作悶的感覺，而食素就唔會，所以對鐘意食水果, 蔬菜, 焗薯和沙律，尤其是凱撒沙律。 出院當日(21號)打最後一包2小時的化療藥，個包最影響我個胃，搞到胃痛，上次都係咁，所以肯定到係佢，食粒胃藥半個鐘就無事，今次可以即日出院，yeah。

步驟： - 準備針筒, 綿花(備用), 小酒精綿布, 小圓形膠布 - 清潔雙手 - 選一舊位於肚臍左下或右下2cm的位置，啫起的腹部脂肪，用酒精綿布清潔。隔日打一個位置，今日打左明日打右 - 待風乾一會，可將酒精綿布放在脂肪附近作識別 - 啫起脂肪，快速打入針筒，不會很痛 - 慢慢推入藥 - 推到盡，直至聽到拍一聲。雖然我次次推到盡都無聲，不過打哂藥就好了，一放手就會縮返支針入針筒 - 貼上膠布，完！ - 如果有少量藥汁滴出，可以用綿花球抹走

今日入院特別多人，等耐左。去到病房，今日近窗有景睇，正！之後發現旁邊病房的老人家成日講野😓，聽到阿媽噪到拍床，我都諗今晚實訓唔到，申請轉房，竟然下午老人家自己換房了，仲正！個下開心到飛起，我同阿媽都興奮了😁 食量正常，為黎緊幾日儲糧🙏 暫時一切安心，希望今日化療少啲副作用，感恩🙏

1月2-3日 好滯 唔知點解仲係會作悶 1月4日 終於正常 感覺良好，食野同精神都返哂黎😁 1月6日 覆診，血無事👍 1月8日 唔知點解凌晨腹痛，去睇急診食止痛同益生菌就無事，醫生話小心盲腸炎的可能。留在右腹的痛令我好擔心，聽醫生診斷和照左CT，證實呢個唔係，即時鬆一口氣😅等我仲擔心左成日 1月11日 再覆診，無事

新一年第一日係訓左半日，然後仲滯到夜晚，究竟係我食少左止嘔藥，定係未習慣第二次好似更勁副作用？總之去到傍晚比媽子鼓勵一下，的起心肝行下做運動，先至由打哂喊露，至到而家有精神寫blog，多謝鼓勵！

今次係真出院了，今次無上次咁感慨，因為仲係滯住，成日都係咁，而且仲好驚痾的感覺，一直訓唔好，直至去到夜晚倒數前先精神一振。Anyways, 總算過到2020，係一個好的結束。新一年希望身體回復健康，大家身壯力健，唔好病

12月25日聖誕節化療第一日 雖然肺炎令人出唔到街，好似無乜聖誕氣氛，但係facebook fd好多都有畫畫同開餐，及時行樂係好事黎，我都要學下。 開始無乜胃口，而且皮膏(後背上部分、肩、胸上方)生小粒粒，打左針感覺好d，粒粒淡左，不過間中仲係會痕。 12月26日-28日 化療234日 化療淨係滯都無心情寫blog, 都係食唔多食同訓 12月29日最後一日化療 聽醫生講聽日出院，我好興奮阿！即刻成日有左意志，精神返啲 12月30日疴到9彩 個心都已經出左院，但係突然成日胃痛，痾左成5次，最後一次水都痾埋，總算就咁就唔痛，但搞到要觀察多日先出院

10點入院，之後又要輸液，一針吉入portA痛左一下有(痛程度30%)。之後下晝6點開始打標靶藥，上次打完有出冷汗，希望今次唔會，起碼朝心理準備先。🤔

之前洗頭捽得勁，唔係會keep到更多頭髮，但係咁樣反而有覺悟，日日都甩，執頭髮執到手軟，最後都係光架啦，不如剃哂唔洗麻煩。我係想的，可惜屋企人接受唔到。 btw 

 正常過左幾日，今日開始甩頭髮，其實預左，無乜太大感覺

 覆診得知24號就要第2次化療，又要戰鬥了😳 完成Virtual home tour template with unity，總算有野做到 多謝阿妹幫手，第一次整日式牛肉飯

 精神同食量都返哂黎，學識打白血球針

 出院後第一日，精神都係差少少，要間中訓下，仍然要食止嘔藥，唔係太多胃氣食唔落。

 終於比我出院喇！！ 攞左好多藥同白血球針，然後搭車返屋企，沿途見返街景真係仿如隔世🥺，返屋企的感覺真係好，醫院的睡眠質素太差。

繼續吊鹽水，不過精神好返好多 一開始肚有點餓，飲左包即沖燕麥粥30g 之後姑娘教打白血球針 一打打7日

胃口好好多，不過下午挑戰半份肉醬意粉失敗了，雖然都唔細 早餐：大家樂雞扒蛋+粥 牛餐：食一半的肉醬意粉 晚餐：水餃湯撈麵+營養奶

其餘化療藥都滴完，胃口好好多 竟然食得完一份早餐，相信因為餓左好耐lol 平時精神時間增至8小時 要滴返2日鹽水

其中一款化療藥滴完，似乎個種係最抑制細胞活動，滴完無咁胸悶，可能食返多少少野

都係無精神，無胃口 平時係訓7個鐘，而家係醒7個鐘就想訓

 一早就被叫醒抽血，成日都無精神，好似開左通頂OT咁。下午終於完成24小時的注射，可以鬆管去沖個涼。之後就繼續另一個24小時注射~.~。 感覺上消化麻麻地，無乜胃口，好多氣排出，可能d藥對腸胃都有影響掛。 

第一日注射化療液，一共有三包，其中一包紅色幾特別，副作用係易攰，訓教會突然成身滾熱，有暈眩感，過十分鐘就消退。 早餐：鬆餅； 午餐：小祗園齋河粉+粥 晚餐：住家菜

 一早7:30去到手術室，準備植入portA輸液口。8點打麻醉，一句瞓醒見，就9：30起身，手術完成了。感謝孫醫生和陳醫生用專業的技術幫我完成手術，術後只是傷口有少少交緊的感覺。 之後就可以用呢個輸液口來注射，免受好多皮肉之苦，打手臂針都真係幾痛。 服標靶藥的副作用係當晚訓訓下教喉嚨乾涸，有灼熱感，係咁飲水，過十分鐘就消退。

由畢業出來工作開始，就是不斷的撞板😩。作為developer，每日都遇到唔同的bug, issue, setting problem，次次都本著經一事長一智的精神，希望以後再遇到就可以輕鬆啲。 但是我通常就係太好彩😂，中哂好多奇怪的東西，總是覺得要做得比其他人多，自己又唔係醒目喎，結果花好多時間係解決問題上。 而問題天天都多，仲未必可以預測到。寫app仲可以加個exception包著哂，但就好似今次突然患癌，似乎只有保險可以包底。 記得以前諗住寫“身體好健康捱得”在CV度😅，而家真係打臉了。而家先後悔之前reject左好多保險朋友的介紹，以前覺得只是推銷，病到臨頭先至知係需要的。好彩公司有團體保險，可以包到幾次入院費用。 如果有餘錢，買股票又賺到幾個錢，就不妨買個保險吧。（話自己：而家先諗太遲了😒）

12月2日，為左有下一代，化療之前儲低幾百億為將來之用。原來醫院有AV房，雖然藏量唔多，都叫有雜誌同CD，CD有中同日，雜誌就港日西都有。間房都好乾淨🤔。 下晝抽骨髓，聽人講係抽出黎個下痛，事實上真係。開頭插針入體，微痛，醫生好似連續抽一啲野，抽到咁上下，一股強烈的痛楚湧上pat pat，忍唔住大聲「痛！」，好彩痛楚只係維持左3秒左右，之後就突然無左。醫生再抽多啲，成個過程就完左，好彩無第二下劇痛，再來就要講DLLM🤬。 一直都好感激屋企人的支持🙇，無爸爸媽媽的幫忙，我應該就無救了。入院後提供好多支援，起居飲食無微不至，真的非常感謝！！！🙏

漸漸地先發現三樣徵狀，呢個瘤好古惑阿 抽左血，發炎指數仍然特別高。發現頸部加上呼吸道的症狀之後，醫生轉介去照肺，結果X光片發現胸腔有啲野同有啲積水，但黑白片睇唔清楚，所以再轉照多次CT scan(電腦掃描)。Scan的結果係一個腫瘤。家庭醫生不怠慢，立即轉介我入去醫院睇。 去到醫院呢個stage，一切就好似行雲流水，仲未定過神來，已經回不去了。 11月26日星期四，家庭醫生朝早打電話比我，下晝即刻請病假。有幸由孫漢治醫生診症，在門診好快就斷定係一個前胸腔腫瘤，要盡快入院開始治療。 11月27日，第二日就入院做檢查，個日無咩野做，只係在左手吉左點滴，做野沖涼都無咁方便。 11月28日，都係等報告，成日無所事事，轉下珠，用電腦玩下unity。原本以為今日有報告，結果係無既~~始終星期六人地都要放假。 11月29日星期日，都係等。有時訓醒發現背後出唔少汗，原來連盜汗的徵狀都有。（汗） 11月30日星期一，初步知道係淋巴腺癌，詳細報告就未出。港股有少少收獲。 12月1日星期二，原來係瀰漫大B細胞淋巴癌阿，我仲以為係Covid-19，嚇死我了，始終最近確診case暴升，中左不得了。知道係咩瘤，治療方案也隨即定了，醫生好快手👍。 其實直到星期二，我都唔覺得自己係患癌，無左咳的徵狀，皮膚痕癢少左好多，只係頸有少少腫同盜汗，感覺就好似正常人。我問醫生，其實而家好似都無乜野，唔醫得唔得既呢？他答我，唔醫個腫瘤就會包圍氣管同頸靜脈，你會抖唔到氣。我就服了，始終事實擺疹眼前，腫瘤的樣本都有了，還有假的麼？於是接受現實，接受治療。

步入30歲的半年內，就中左淋巴瘤。 先插一篇文，文中講述： 王銘崇強調， 淋巴癌前兆包括6字口訣「燒腫癢汗咳瘦-6字口訣」，「符合1項就要注意，不過更精準的是持續性不明原因，通常是持續3-4週然後不明原因，就要考慮是淋巴癌。」 回想以前，早至7月30日-8月14日，已經連續3個星期氣管唔舒服而去睇家庭醫生，一直都係氣管間中有痰，會cam cam cam咁想舒通喉嚨。醫生診斷係上呼吸道感染，食氣管藥。之後都係情況差唔多，但習慣了就放任了，cam之嘛。（咳） 8月中至9月中，因為皮膚癢，所以用公司醫療保險睇左3次皮膚科醫生，醫生只說是濕疹，皮膚敏感，開了敏感藥和做了敏感測試，話對蝦相對敏感。間唔中無食藥係我的錯，不過食完藥都係有癢，食唔食蝦都會。（癢） 9月頭的時候，收到身體檢查的報告，話大部分正常，只係發炎指數偏高。發炎指數？食得架？一向無聽過呢個term，而且無太大異樣，也就不理了。醫生亦說發炎指數高可以有好多解釋，沒什麼大不了。 9至11月中都係咁過，並無其他太大唔舒服，直至11月17號忍唔住再因氣管睇多次家庭醫生。食左幾次藥，接著的星期六發現頸部腫大，塊面都腫起左，頸右邊的靜脈仲脹起左，向上舉頭覺得條頸拉緊哂，就驚驚青青咁話比醫生知。醫生話藥唔會令頸腫，我就唔理打多日波先。之後先至轉介去抽血。（腫）

我鍾意打籃球，玩手機(pad, youtube, 聽粵語同日文歌)。大學畢業後一直從事IT寫app的工作。理科出身，文筆一般，請見諒。